नवी दिल्ली ब्युरो : काँग्रेस नेते राहुल गांधी गेल्या काही दिवसांपासून राजकारणाव्यतिरिक्तही इतर गोष्टींमुळे चर्चेत आहेत. आता तामिळनाडूतील एका मुलाला रनिंगसाठी शूज पाठवल्यामुळे राहुल गांधी चर्चेत आले आहेत. या मुलाला रनिंगच्या ट्रेनिंगसाठी शूज नव्हते, याची माहिती मिळताच राहुल गांधींनी त्याला एक जोडी शूज पाठवले आहेत. तामिळनाडू युवा काँग्रेसने ट्वीट करत याबाबत माहिती दिली आहे.
अँटनी फेलिक्स असं या धावपटू मुलाचं नाव आहे. अँटनी 100 मीटर रनिंगचा सराव करतो. पण त्याच्याकडे चांगले शूज नव्हते. तमिळनाडू दौऱ्यात राहुल गांधी यांनी या मुलाची भेट घेतली. माझ्यापेक्षा वेगाने धावता येईल का? असं राहुल गांधींनी त्याला विचारले होते. त्यावर अँटनीने दिलेल्या उत्तरावर खूश होऊन राहुल गांधींनी त्याला शूज पाठवण्याचं आश्वासन दिलं होतं. तेच आश्वासन राहुल गांधी यांनी आता पूर्ण केलं आहे. राहुल गांधी यांनी पाठवलेले शूजदेखील चांगल्या क्वालिटीचे आहेत.
During his TN Visit, @RahulGandhi saw this boy(felix) , who is a 100 meter sprinter without shoes, he promised to get this boy his pair of shoes for sprints, today the promise has been fulfilled by my leader Rahul Gandhi.#RahulGandhi #MyLeaderRahulGandhi #PromiseKept pic.twitter.com/vd5wzPmXjb
— Tamil Nadu Youth Congress (@TN_PYC) March 9, 2021
याबाबत तामिळनाडू युवा कॉंग्रेसच्या अधिकृत ट्विटर हँडलने ट्वीट केलं आहे. “राहुल गांधींनी फेलिक्सला धावताना पाहिलं होतं आणि त्याला शूज पाठवण्याचा शब्द दिला होता. आमच्या नेत्याने या मुलाला दिलेला शब्द पूर्ण केला आहे”, असं ट्विट तामिळनाडू युवा काँग्रेसने केलं आहे.
राहुल गांधी 1 मार्च रोजी तमिळनाडूमध्ये प्रचारादरम्यान कन्याकुमारीहून तिरुवनंतपुरमकडे जात होते. शेकडो लोक रस्त्यावर उभे होते. वाटेत राहुल गांधी चहाच्या दुकानात थांबले होते. याठिकाणी त्यांची अँटोनी फेलिक्स नावाच्या 12 वर्षाच्या मुलासोबत भेट झाली. फेलिक्स राहुल गांधींना भेटला त्यावेळी अनवाणी होता. फेलिक्ससोबत बोलल्यानंतर तो धावपटू असल्याचं राहुल गांधींना समजलं. यावर राहुल गांधींनी त्याला विचारले की माझ्यापेक्षा वेगाने धावू शकतो का? त्यावर फेलिक्सने लगेच उत्तर दिलं की,”हो, मी तुमच्यापेक्षा वेगाने धावू शकतो.” फेलिक्सच्या उत्तराने राहुल गांधी खूपच खूश झाले. त्यांनी त्याच्या शूजची साईज विचारली आणि एक जोडी शूज पाठवण्याचा शब्द दिला. आता फेलिक्सला राहुल गांधींनी पाठवलेले शूज मिळाले आहेत.
बुटाची किंमत किती आहे?
राहुल गांधींनी अँटनी फेलिक्सला पाठवलेला बुट ASICS या कंपनीचा आहे. फेलिक्सला मिळालेल्या शूजची किंमत ऑनलाईन 5499 रुपये आहे.