असनी चक्रीवादळाने 24 तासांत आपला मार्ग बदलला आहे. हे चक्रीवादळ मंगळवारपर्यंत ओडिशा आणि बंगालच्या उपसागराकडे सरकण्याची भीती असतानाच ते आता आंध्र प्रदेशकडे सरकले आहे. हवामान खात्याने मंगळवारी आंध्र प्रदेशसाठी रेड अलर्ट जारी केला आहे. या वादळामुळे राज्यात मोठ्या प्रमाणात हानी होऊ शकते. या अलर्टनंतर राज्यात आज होणाऱ्या इंटरमिजिएट परीक्षा पुढे ढकलण्यात आल्या आहेत.
भारतीय हवामान विभागाचे शास्त्रज्ञ, संजीव द्विवेदी यांनी सांगितले की, चक्रीवादळ बुधवारी सकाळी काकीनाडा आणि विशाखापट्टणम दरम्यान आंध्र प्रदेशच्या किनारपट्टीवर धडकू शकते. त्यानंतर ते पश्चिम-मध्य बंगालच्या उपसागरात पोहोचू शकते. त्यामुळे आंध्र प्रदेशात रेड अलर्ट जारी करण्यात आला आहे. या वादळाचा प्रभाव बिहार, झारखंड, छत्तीसगडमध्येही राहील. 11 ते 13 मे या कालावधीत येथे पाऊस पडेल, तसेच जोरदार वारे देखील वाहतील.
आंध्रप्रदेशात असनी चक्रीवादळामुळे मुसळधार पावसासह ताशी 100 किलोमीटर वेगाने वारे वाहतील. त्यामुळे राज्यात नुकसान होण्याची शक्यता आहे. या पार्श्वभूमीवर चक्रीवादळाशी संबंधित आपत्ती टाळण्यासाठी स्थानिक प्रशासनाला सतर्क राहण्यास सांगण्यात आले आहे.
IMD नुसार, श्रीकाकुलम, विझियानगरम, विशाखापट्टणम, पूर्व गोदावरी, कृष्णा, गुंटूर आणि पश्चिम गोदावरी जिल्ह्यांमध्ये बुधवारी सकाळी 8.30 वाजेपर्यंत आंध्र प्रदेशात 60 ते 40-50 किमी प्रतितास वेगाने वादळी वाऱ्यासह जोरदार पाऊस पडण्याची शक्यता आहे.
