Home हिंदी कोव्हिड-19 : आता नागपुरात प्रत्येक झोनमध्ये फिरते चाचणी केंद्र

कोव्हिड-19 : आता नागपुरात प्रत्येक झोनमध्ये फिरते चाचणी केंद्र

महापौर जोशी आणि मनपा आयुक्तांच्या हस्ते 12 बसेसचे लोकार्पण

नागपूर ब्यूरो : नागपूर शहरातील जास्तीत – जास्त नागरिकांची कोव्हिड चाचणी व्हावी यासाठी नागरिकांना त्यांच्या परिसरात सहजतेने चाचणीची सुविधा उपलब्ध करुन देणे गरजेचे होते. त्याकरिता मनपातर्फे प्रत्येक झोनमध्ये फिरत्या कोव्हिड चाचणी केंद्राची सुविधा करण्यात आली आहे. नागरिकांच्या सुरक्षेच्या दृष्टीने मनपाच्या ‘आपली बसचे’ ढाच्यामध्ये किरकोळ परिवर्तन करून त्या बसेस ‘फिरते कोव्हिड चाचणी केंद्र’ म्हणून तयार करण्यात आल्या आहेत. अशा 12 बसेस सध्या सज्ज असून त्याचे महापौर संदीप जोशी व मनपा आयुक्त राधाकृष्णन बी. यांनी बुधवारी (30 सप्टेंबर) हिरवी झेंडी दाखवून रवाना केले.

याप्रसंगी स्थायी समिती सभापती विजय (पिंटू) झलके, सत्तापक्ष नेते संदीप जाधव, विरोधी पक्षनेते तानाजी वनवे, परिवहन समिती सभापती नरेंद्र (बाल्या) बोरकर, नागपूर सुधार प्रन्यासच्या सभापती शीतल उगले-तेली, मनपा चे अतिरिक्त आयुक्त जलज शर्मा, राम जोशी, संजय निपाने, परिवहन व्यवस्थापक शकील नियाजी, वैद्यकीय आरोग्य अधिकारी डॉ.संजय चिलकर, सहायक आरोग्य अधिकारी डॉ.भावना सोनकुसळे, डॉ.विजय जोशी, डॉ.सागर नायडू, डॉ.शुभम मनगटे, परिवहन विभागाचे प्रशासकीय अधिकारी रवींद्र पागे, अरुण पिपरूडे आदी उपस्थित होते.

असा प्रयोग करणारी राज्याची पहिली मनपा : महापौर

यावेळी बोलताना महापौर संदीप जोशी म्हणाले, आज शहरातील कोरोना बाधित रुग्णांची संख्या कमी होत आहे. मात्र धोका कमी झाला नाही. त्यामुळे चाचणीची संख्या वाढविणे आवश्यक आहे. राज्य शासनाच्या ‘माझे कुटुंब माझी जबाबदारी’ या अभियाना अंतर्गत शहरातील नागरिकांचे सर्वेक्षण सुरू असून त्यात एखाद्याला लक्षणे आढळल्यास त्यांची त्वरीत चाचणी करण्यास या बसेस महत्वाची भूमिका बजावणार आहेत. शहरातील दहाही झोनमध्ये प्रत्येकी एक बस उपलब्ध असून स्थानिक नगरसेवक व लोकप्रतिनिधींच्या सहकार्याने चाचणी केली जाणार आहे. शहर बसचा उपयोग कोव्हिड चाचणी केंद्रासाठी करणारी नागपूर महानगरपालिका ही राज्यातील पहिली महानगरपालिका असल्याचेही त्यांनी यावेळी सांगितले.

शहरात आता 14 फिरते कोव्हिड चाचणी केंद्र : आयुक्त

मनपा आयुक्त राधाकृष्णन बी. यांनी यावेळी प्रत्येक नागरिकांनी लक्षणे न लपवता तातडीने चाचणी करण्याचे आवाहन केले. आजघडीला नागपूर शहरात 55 कोव्हिड चाचणी केंद्र सुरू करण्यात आले आहेत. हे सर्व चाचणी केंद्र आणि शहरातील इतर खाजगी लॅबमधून दररोज सुमारे 6 हजार चाचण्या केल्या जात आहेत. राज्य शासनाच्या ‘माझे कुटुंब माझी जबाबदारी’ या अभियाना अंतर्गत आता शहरातील नागरिकांना त्यांच्या घराजवळ परिसरातच कोव्हिडची चाचणी करता यावी यासाठी या कोव्हिड चाचणी बसेसची व्यवस्था करण्यात आली आहे. नागपूर महानगरपालिकेद्वारे यापूर्वी एका रुग्णवाहिकेमध्ये फिरते चाचणी केंद्र तयार करण्यात आले होते त्यानंतर प्रभावती ओझा स्मृती फिरते कोव्हिड चाचणी केंद्र रामकिशन ओझा यांच्यातर्फे उपलब्ध करून देण्यात आले आहे. मनपाकडे आधी हे दोन फिरते चाचणी केंद्र उपलब्ध होते. आता परिवहन विभागाच्या सहकार्याने यामध्ये 12 केंद्रांची भर पडली आहे. अश्याप्रकारे शहरात एकूण 14 फिरते कोव्हिड चाचणी केंद्र नागरिकांच्या सुविधेसाठी उपलब्ध करण्यात आले आहेत.

बसमधून एकावेळी दोघांची चाचणी

‘आपली बस’मध्ये परिवर्तन करून तयार करण्यात आलेल्या कोव्हिड चाचणी केंद्रामधून एकावेळी दोन जणांची चाचणी केली जाणार आहे. यासाठी बसमध्ये दोन डॉक्टर, एक नर्स आणि एक स्वच्छता कर्मचारी नियुक्त करण्यात आले आहेत. बसमधून रुग्ण आणि डॉक्टरांचा प्रत्यक्ष संपर्क न येता चाचणी करण्याची व्यवस्था करण्यात आली आहे. बसमध्ये मुख्यत: आरटीपीसीआर चाचणी करण्यात येणार आहे.


वाचकांनो आपन “आत्मनिर्भर खबर डॉट कॉम” ला ट्वीटर, इंस्टाग्राम आणि फेसबुक पर फॉलो करत आहात ना? अजूनपर्यंत ज्वाइन केले नसेल तर आमच्या अपडेट्स साठी आत्ताच क्लिक करा (ट्वीटर- @aatmnirbharkha1), (इंस्टाग्राम- @aatmnirbharkhabar2020), (फेसबुक- @aatmnirbharkhabar2020).

LEAVE A REPLY

Please enter your comment!
Please enter your name here